ستار أكاديمي...عندما تصرخ الفضيلة

طبعا أكيد كتيير مننا سمع عن ستار أكاديمي هذه الأكاديمية العريقة التي تهتم بالعظيم من الأمور ومشاكل الجيل

كانت اول معرفتي بهذا الصرح الهائل من سنة ونص او اكتر بقليل كل شويه واحد او واحده صوتهم غريب وكلامهم وسلوكهم اغرب يظهر آل ايه بيغني واسمعهم بيقولوا نجم ستار أكاديمي

قلت لا مبدهاش بئه الواحد لازم يواكب الأحداث الجاريه ويشوف مين الناس دي وستار أكاديمي دول يطلعوا ايه؟

وعرفت وياريتني ما عرفت

ولاد وشباب من دول عربية مختلفة قاعدين في الاكاديمية دي مع بعض طيب بيعملوا ايه؟

آل ايه بيتعلموا الغناء والرقص وكل شويه مسابقات برايم وحفلات لا وكمان عملولهم قناة كأنك معاهم لحظة بلحظة الاربعة وعشرين ساعة بتوع اليوم زي ما يكون مش ورانا غيرهم بعد ما كانت ساعة بس الال بي سي بتعرضها في اليوم

أنا عرفت كل ده ودمي فار وضغطي وطي وحالتي بئت حالة

شايفين شبابنا الواعد بيفكر وبيهتم بإيه

شايفين الآباء والامهات الله يهديهم بيوجهوا أبناءهم وبناتهم لإيه

دلواتي بئه كل بيت في العالم العربي لازم وبفضل ونعمة تلاقي فيه مغني او مغنيه وراقصة

طبعا ما هو الفن ده رساله ولازم ينشروها علشان يشغلوا الشباب والبنات عن هموم عالمهم العربي والامه

ازاي ينسونا بلادنا العربية اللي بتصرخ في كل حته غير بصوت غوغاء وخبط ورزع يشوشروا بيه علي صوت بكاء الاطفال والرضع

ازاي يشيلوا من قلبنا حب الدين واخلاقه غير بانهيار الفضيله ومحاربتها

ما سألتوش نفسكم هم ليه بيصرفوا المبالغ دي كلها من حفلات لمدرسين للهبابة الاكاديمية ؟؟

زي ما يكون خدوا العيال وعملولهم غسيل مخ واللي ينقط انهم مش هم لوحدهم لا ولاهاليهم كمان

الاقي والدة احدي المتسابقات تكلمها وتقولها صلي يا حبيبتي وانا بدعيلك ومتابعاكي كل يوم علي القناة وخدي بالك انتي وفلان اللي هو من نفس بلدها من بعض

ياسلااام عليكي يا حاجة لا بجد عرفتي تربي

تصلي ايه يا حاجة صلي انتي عالنبي-عليه أفضل الصلاة والسلام-

الناس دي بتضحك علي نفسها ولا ايه ايه الخلط في الاوضاع اللي حاصل ده

بئه العري والابتذال والتافه من الامور رسالة بنسعي نوصلها والفضيله بئينا بنحاربها وبنوئدها

بئه مش ورانا غير اخبار ستار أكاديمي وفلان المتسابق كان بيحب فلانة المتسابقة اللي هي اصلا بتحب الواد التاني واخبار البرايم ونقعد ادام التليفزيون نتابع الباشوات وندعي ونقول كلنا وراكم يله ارفعوا راسنا

راسنا ايه بس دي خلاص بئت في الوحل

بجد مش عارفه اقول ايه كفاية فضايحهم اللي ملت الجرايد والمجلات ومواقع الانترنت

كان نفسي احط صور للبوست بس للاسف مالقتش صورة محترمة احطها

وقفة يابنات وياشباب ياللي في عمر الزهور ولسه بتبتدي حياتك

هو ده اللي بتتمناه او بتتمنيه ليكم؟؟هو ده المجد اللي نفسكم تحققوه؟؟هي دي الحياة اللي حلمتوا تعيشوها؟؟هو ده حق الوطن عليكم؟؟

وانتوا ياأولياء الأمور

هل دي الرسالة اللي تعبتوا طول عمركم علشان توصلوها لأولادكم؟؟هل ده حصاد تعب وكفاح السنين؟؟هل ده المكان اللي تتمنوا تشوفوا فلذات اكبادكم فيه؟؟

نفكر شويه صغنتتين بعقل ونشيل الصراصير اللي جوه دي اللي دخلها ناس ولا مننا ولا من اخلاقنا في دماغنا

ياريت نسمي الامور بمسمياتها الصح وكفاية بئه خلط في الاوضاع اكتر من كده॥

سوري علي جرعة الكآبة دي بس بجد لو مكنتش فضفضت كنت هطق وأموت وانتوا ميخلصكوش كده

سمسمة