أكــــــــل من غير مـــــــــلح

أكيد طبعا اللي قرأ العنوان من البنانيت قال إن أكيد الأكل ده لمرضي الضغط العالي ووإللي قرأه من الجنس الخشن أكيد قال إن الأكل ده اللي عاملاه دكتورة لسه متزوجة جديد ده طبعا نظرا لخبرتهن الضحلة جداً بالمطبخ॥
العنوان ليس فيه ما يدعو للاستغراب لاننا بصراحة حياتنا كلها أصبحت عبارة عن أكل من غير ملح
فقدنا فيها كل المعاني الحلوة للأشياء مثلا يعني
الإبتسامة اللي هي السعادة اللي بتترسم علي الوجه بتعبر عن سعادة القلب أصبحت دلواتي عبارة عن وش مرسوم عليه فم بيضحك وسعادة القلب اللي هي المعني الجميل للسعادة لم يعد لها وجود।
وغيرها كتير من امور الدين والدنيا
هتقولي مش كلنا كده ده استثناء ولكل قاعده شواذها
هقولك معاك وموافق بس تعالي كده ناخد طبق واحد من الاكل اللي من غير ملح ده,أنا إخترت الطبق ده مش لإني طفسة ولا حاجة بس لإننا كلنا بنتناول الطبق ده خمس مرات في اليوم وفيه مننا اللي بيتناوله اكتر من كده جعلنا الله واياك منهم।
أكيد عرفتوا معايه طبق اليوم,الصلاة ياجماعه وملحها طبعا زي ما كلنا عارفين هو الخشوع
تقدر حضرتَك وحضرٍتك تقولولي آخر مرة كنت خاشع في صلاتك إمتي؟
ياتري كلنا بندور علي الخشوع ده وندعي ربنا ينوله لينا قبل ما نبدا في الصلاة؟؟؟
ياتري الصلاة قرة أعيننا وبنادي ونقول أرحنا بها يابلال ؟؟
لو مذاكرتش شوية من غير تركيز وبالذات الأيام الصعبة دي الدنيا بتقوم ومش بتقعد وتتصل بصاحبك وصاحبتك وتشكي ليها وتبقي عاوز تنتحر من قلة تركيزك فالمذاكرة।
ياتري بنرفع سماعة التليفون ونقول لأصحابنا أنا والله ما عرفتش اخشع اليوم في صلاة المغرب مثلا؟؟
يله بئه نقف وقفة صدق مع انفسنا ونسال آخر مرة خشعتي فيها في صلاتك كانت إمتي؟
يله نعمل كراسة او نوته صغننة من ام ربع جنيه دي أو ياسيدي ورقتين ودبسهم وكل يوم بعد ما تصلي إكتب نسبة خشوعك النهارده كانت اد ايه وحاول تزودها لحد ما تجيب الفووووول مارك
ياتري لو داخل تقابل حد مهم مش هتبقي خايف وخاشع وركبك بتخبط عالجيرااان
فما بالك بالوقوف أمام ربي وربك ورب كل شئ أفلا نخشع؟؟؟؟
ألم يأن لنا أن تخشع قلوبنا وجوارحنا في صلاتنا لله
يله ياجماعه نردد سوا ونقول
بــــــــــــــــــــــــــلي لقد آن..

سمسمة